यवतमाळ -/राजकारण्यांचे वरदहस्त लाभले की कायद्याचे रक्षक कसे हतबल होतात आणि गुन्हेगारांचे मनोबल कसे उंचावते, याचे जिवंत उदाहरण सध्या उमरखेड आणि हदगाव तालुक्याच्या सीमावर्ती भागात पाहायला मिळत आहे. हदगावमधून हुसकावून लावलेला अवैध कट पत्त्याचा ‘बादशहा’ सिद्धू मनवर याने आता आपला मोर्चा उमरखेडकडे वळवला असून, चिंचोली परिसरात कोट्यवधींच्या उलाढालीचा जुगार अड्डा सुरू केला आहे. विशेष म्हणजे, या संपूर्ण प्रकरणावर स्थानिक लोकप्रतिनिधींचे ‘मौन’ आणि प्रशासनाची ‘डोळेझाक’ ही लोकशाहीसाठी चिंतेची बाब ठरत आहे. मिळालेल्या माहितीनुसार, हदगाव विधानसभा क्षेत्राचे आमदार बाबुराव कोहळीकर यांनी आपल्या परिसरात कोणत्याही अवैध धंद्यांना थारा दिला जाणार नाही, अशी आक्रमक भूमिका घेतली. परिणामी, हदगावमध्ये पाय रोवून बसलेल्या सिद्धू मनवरला तिथून पळ काढावा लागला. एका लोकप्रतिनिधीने इच्छाशक्ती दाखवली तर गुन्हेगारी कशी मोडीत निघते, याचे उदाहरण कोहळीकर यांनी घालून दिले.
मात्र, धक्कादायक बाब म्हणजे, हदगावमधून पळ काढलेला हा ‘जुगार सम्राट’ उमरखेडच्या सीमेवरील चिंचोली येथे विसावला आहे. तिथे त्याने “एका बादशहा” या नावाने हायप्रोफाईल कट पत्त्याचा अड्डा सुरू केला असून, दररोज या ठिकाणी कोट्यवधी रुपयांची उलाढाल होत असल्याची चर्चा आहे. उमरखेडमध्ये सुरू असलेल्या या अवैध साम्राज्याबाबत जनतेत तीव्र संताप व्यक्त होत आहे. उमरखेडचे आमदार किशनराव वानखेडे यांची या प्रकरणाला ‘मूक संमती’ असल्याचा खळबळजनक आरोप आता उघडपणे केला जात आहे. “राजकीय पाठबळाशिवाय एवढ्या मोठ्या प्रमाणावर, आलिशान गाड्यांच्या ताफ्यासह जुगार भरवणे शक्यच नाही,” असा थेट सवाल सामान्य नागरिक विचारत आहेत. एका बाजूला हदगावचे आमदार गुन्हेगारीला हद्दपार करत असताना, दुसऱ्या बाजूला उमरखेडमध्ये गुन्हेगारांचे स्वागत का केले जात आहे? असा संतप्त प्रश्न जनतेच्या मनात आहे.
🔥तरुणाई उद्ध्वस्त, गुन्हेगारीला खतपाणी
हा केवळ जुगार नाही, तर ही सामाजिक व्यवस्था पोखरून काढणारी वाळवी आहे. या हायप्रोफाईल अड्ड्यामुळे:
युवा पिढी बरबाद सोप्या पैशाच्या आमिषाने तालुक्यातील तरुण पिढी या दलदलीत ओढली जात आहे. जुगाराच्या नादात अनेक सामान्य कुटुंबे रस्त्यावर आली असून घराघरात वाद पेटले आहेत.
गुन्हेगारीत वाढ,जिथे जुगार आला, तिथे अवैध दारू आणि इतर गुन्हेगारी प्रवृत्तींना आपोआपच खतपाणी मिळत आहे.
एवढ्या मोठ्या प्रमाणावर जुगार सुरू असताना पोलीस प्रशासनाला याची माहिती नसेल, हे पटण्यासारखे नाही. जर माहिती असूनही कारवाई होत नसेल, तर याचा अर्थ पोलीस प्रशासन आणि गुन्हेगारांचे साटेलोटे आहे का? कायदा काय फक्त गरिबांच्या घरांवर दंडुके चालवण्यासाठीच उरला आहे का? असा रोखठोक सवाल उपस्थित केला जात आहे. पोलीस अधीक्षकांनी या प्रकरणात तातडीने लक्ष घालून या अड्ड्यावर धाड टाकणे अपेक्षित असताना, स्थानिक पोलीस मात्र सोयीस्कररीत्या शांत बसल्याचे चित्र आहे.
उमरखेड तालुका जुगारपट्टीचे केंद्र बनू नये, यासाठी आता जनतेनेच पुढाकार घेण्याचे ठरवले आहे. सिद्धू मनवरसह या व्यवसायाशी संबंधित सर्व सूत्रधारांवर तातडीने गुन्हे दाखल करून त्यांना अटक करा.
या अवैध धंद्याला पाठबळ देणाऱ्या राजकीय नेत्यांची आणि पोलीस अधिकाऱ्यांची सखोल चौकशी करा. प्रकरणाचे गांभीर्य लक्षात घेऊन उच्चस्तरीय स्वतंत्र तपास पथकाची (SIT)
जर वेळीच ही अवैध उलाढाल थांबली नाही, तर हा परिसर गुन्हेगारीचा अड्डा बनण्यास वेळ लागणार नाही. सत्तेच्या खुर्चीवर बसलेल्यांनी जनतेच्या विश्वासाचा सौदा करू नये. हा प्रकार म्हणजे कायद्याचा निर्घृण खून असून, जनतेच्या सहनशीलतेचा अंत पाहू नका, असा इशारा आता नागरिक देत आहेत.(क्रमशः)
🔥हाच तो सिद्धू मनवर जुगारांचा नंगा नाच खुलेआम सुरू करणारा. 
