हिंगणा – / वानाडोंगरी नगरपरिषद अंतर्गत येणाऱ्या महाजनवाडी परिसरातील तेजस्वी विद्यामंदिर शाळेचे वार्षिक स्नेहसंमेलन महाराजा सभागृहात अत्यंत उत्साहपूर्ण आणि सांस्कृतिक वातावरणात पार पडले. विद्यार्थ्यांच्या कला, नृत्य, अभिनय व संस्कारांचे दर्शन घडवणारा हा सोहळा उपस्थित पालक, शिक्षक व नागरिकांसाठी अविस्मरणीय ठरला.
या कार्यक्रमाच्या अध्यक्षस्थानी नितीन कोंगरे, सदस्य, नागपूर विद्यापीठ, हे उपस्थित होते.
कार्यक्रमाला प्रमुख पाहुणे म्हणून देवराव कोकाटे (सचिव, साईबाबा शिक्षण संस्था), धनराज बाबडे (अध्यक्ष), वानाडोंगरी भाजपचे अध्यक्ष सचिन मेंडजोगे, संस्थेचे सदस्य शैलेश थोराणे, ज्येष्ठ शिक्षण विस्तार अधिकारी लीलाधर चरपे, शिक्षण विस्तार अधिकारी चंद्रभान शोभणे यांची प्रमुख उपस्थिती लाभली. याशिवाय वानाडोंगरी नगरपरिषदेच्या नवनिर्वाचित नगराध्यक्षा सुनंदा बागडे, नवनिर्वाचित नगरसेवक आबा काळे, शेखर बाबळे, बाळू मोरे, नगरसेविका सुषमा घाटोळे, चंदाताई अजमीरे, सिंधुताई निघोट तसेच सामाजिक कार्यकर्ते योगेश कुमकुमवार, राहुल बागडे, विनायक इंगळे, कल्पना बाबळे यांच्यासह मोठ्या संख्येने पालक व नागरिक उपस्थित होते.
विद्यार्थ्यांचा सांस्कृतिक ठेवा
कार्यक्रमाची सुरुवात विद्यार्थ्यांच्या स्वागत गीताने झाली. त्यानंतर देशभक्तीपर गीत, लोकनृत्य, समूह नृत्य, एकांकिका आणि सामाजिक संदेश देणाऱ्या नाट्यछटांनी सभागृहातील उपस्थितांची मने जिंकली. विद्यार्थ्यांच्या सादरीकरणातून आत्मविश्वास, शिस्त आणि संस्कारांचे सुंदर दर्शन घडले.
मार्गदर्शन आणि प्रेरणा
यावेळी सचिन मेंडजोगे, शैलेश थोराणे, नितीन कोंगरे, देवराव कोकाटे व धनराज बाबडे यांनी विद्यार्थ्यांना मार्गदर्शन करताना सांगितले की, शिक्षणाबरोबरच संस्कार, क्रीडा, कला व सामाजिक जाणीव यांचा समतोल विकास घडणे अत्यंत गरजेचे आहे.
विद्यार्थ्यांनी मेहनत, शिस्त व सातत्य ठेवले तर यश नक्कीच मिळते, असा विश्वास मान्यवरांनी व्यक्त केला.
मान्यवरांचा सत्कार
कार्यक्रमाच्या निमित्ताने वानाडोंगरी नगरपरिषदेच्या नवनिर्वाचित नगराध्यक्षा व सर्व नवनिर्वाचित नगरसेवकांचा शाळेच्या वतीने सन्मानपूर्वक सत्कार करण्यात आला. या सत्कारामुळे विद्यार्थ्यांमध्ये लोकप्रतिनिधींबद्दल आदर व लोकशाही मूल्यांची जाणीव निर्माण झाल्याचे दिसून आले.
सूत्रसंचालन व आभार
प्राचार्या मनीषा मेने यांनी प्रास्ताविक करताना शाळेच्या शैक्षणिक व सहशैक्षणिक उपक्रमांचा आढावा घेतला.
कार्यक्रमाचे नेटके सूत्रसंचालन पल्लवी लांजेवार व जीत मंडलेकर यांनी केले, तर शोभा शर्मा व पूनम इंगळे यांनी उपस्थितांचे आभार मानले.
यशस्वी आयोजन
हे स्नेहसंमेलन यशस्वी करण्यासाठी शाळेच्या सर्व शिक्षकवृंद व शिक्षकेतर कर्मचाऱ्यांनी विशेष परिश्रम घेतले. पालकांनीही शाळेच्या उपक्रमांचे कौतुक केले.
🔥तेजस्वी विद्यामंदिर शाळेचे स्नेहसंमेलन दिमाखात संपन्न; विद्यार्थ्यांच्या कलागुणांना रसिकांची भरभरून दाद.
