🔥खाकीतील ‘काळा’ कारभार: उमरखेडचे ठाणेदार शंकर पांचाळ यांचा भ्रष्टाचाराचा ‘साहसीक’ ने केला पर्दाफाश!…

🔥हेच ते उमरखेड चे ठानेदार शंकर पांचाळ एलसीबी प्रमूख बनन्यासाठी नंबर २ धंदे वाले चा घेत आहे सहकार्य.

🔥हाच तो तीनपत्ती चा चालक मालक शिदु मनवर राजकीय लोकांचा आशीर्वाद घेऊन करतो नंबर दोन चा धंदा.
​यवतमाळ -/ रक्षकाच जेव्हा भक्षक बनतो, तेव्हा कायद्याची चौकट मोडायला वेळ लागत नाही. उमरखेड पोलीस ठाण्याचे प्रभारी पोलीस निरीक्षक शंकर पांचाळ यांच्या आशीर्वादाने सुरू असलेल्या अवैध धंद्यांचे साम्राज्य आणि जिल्हा पोलीस दलात बदल्यांसाठी सुरू असलेला ‘अर्थ’पूर्ण व्यवहार आता चव्हाट्यावर आला आहे. ‘दैनिक साहसीक’ने प्रसिद्ध केलेल्या खळबळजनक वृत्तामुळे पोलीस वर्तुळात एकच खळबळ उडाली असून, भ्रष्ट अधिकाऱ्यांचे धाबे दणाणले आहेत.

​प्रजासत्ताक दिनी देश उत्सव साजरा करत असताना, उमरखेडमध्ये मात्र एका वेगळ्याच ‘नाटकाचा’ प्रयोग सुरू होता. दैनिक साहसीकच्या जळजळीत बातमीनंतर, जनक्षोभाला घाबरून ठाणेदार शंकर पांचाळ यांनी २६ जानेवारीपासून उमरखेड परिसरातील सर्व अवैध धंदे बंद केल्याचा बनाव रचला. मात्र, विश्वसनीय सूत्रांकडून मिळालेल्या माहितीनुसार, हे धंदे कायमचे बंद झाले नसून, ते केवळ ‘कथित स्वरूपात’ आणि काही काळासाठी पडद्याआड गेले आहेत. जनतेच्या डोळ्यात धूळफेक करण्यासाठी हा केवळ एक प्रशासकीय स्टंट असल्याची चर्चा परिसरात रंगली आहे. ​उमरखेड परिसरात मटका, जुगार, अवैध दारू आणि इतर काळ्या धंद्यांतून ठाणेदार पांचाळ यांनी कोट्यवधींची माया गोळा केल्याचा आरोप होत आहे. याच पैशाच्या जोरावर आता त्यांना स्थानिक गुन्हे शाखा (LCB) यवतमाळचे ‘डोहाळे’ लागले आहेत. LCB मध्ये नियुक्ती मिळवण्यासाठी पांचाळ यांनी सिद्दू मनवर आणि नितीन बांगडू यांच्या माध्यमातून नितीन भट्टू याला मोठी ‘सुपारी’ दिल्याची धक्कादायक माहिती समोर आली आहे. पोलीस दलात सेवा देण्यासाठी नव्हे, तर ‘मलिदा’ खाण्यासाठी वरिष्ठ पदांची अशी लिलाव पद्धती सुरू असणे, हे यवतमाळ पोलीस दलासाठी लज्जास्पद आहे.
​​वाढत्या तक्रारी आणि भ्रष्टाचाराचे पुरावे पाहता, यवतमाळचे पोलीस अधीक्षक यांनी २७ जानेवारी रोजी शंकर पांचाळ यांना सक्त ताकीद दिल्याचे समजते. मात्र, प्रश्न हा उपस्थित होतो की, केवळ ‘ताकीद’ देऊन हा भ्रष्टाचार थांबणार आहे का? जर एखादा अधिकारी उघडपणे वसुली आणि अवैध धंद्यांना पाठबळ देत असेल, तर त्यावर निलंबनाची कारवाई का केली जात नाही? अधीक्षक स्तरावरून दिलेली ही ताकीद खरोखरच कठोर आहे की प्रकरण दाबण्यासाठी दिलेला एक इशारा, याकडे सर्वांचे लक्ष लागले आहे.
​​दुसरीकडे, एल. सी. बी. यवतमाळचे वर्तमान पोलीस निरीक्षक चवरे यांनी आपली खुर्ची टिकवण्यासाठी जंग जंग पछाडले आहे. चवरे यांनी स्वतःची बदली रोखण्यासाठी मोठी ‘राजकीय फिल्डिंग’ लावली असून, राजकीय वरदहस्त मिळवण्यासाठी प्रयत्न सुरू केले आहेत. एका बाजूला पांचाळ हे खुर्ची मिळवण्यासाठी प्रयत्नशील आहेत, तर दुसरीकडे चवरे ती टिकवण्यासाठी. या दोघांच्या ‘खुर्ची युद्धा’मध्ये मोठ्या प्रमाणात आर्थिक उलाढाल आणि देवाणघेवाण सुरू असल्याची चर्चा पोलीस मुख्यालयाच्या कोपऱ्याकोपऱ्यात रंगत आहे. ​पोलीस विभाग हा समाजाचा आधारस्तंभ मानला जातो. मात्र, शंकर पांचाळ यांच्यासारखे अधिकारी जेव्हा पदाचा दुरुपयोग करून स्वतःची तिजोरी भरतात, तेव्हा सर्वसामान्य माणसाचा कायद्यावरचा विश्वास उडतो. अवैध धंद्यातून गोळा झालेला पैसा जेव्हा बदल्यांसाठी आणि पोस्टिंगसाठी वापरला जातो, तेव्हा तो विभाग सेवा देण्यासाठी नव्हे तर ‘धंदा’ करण्यासाठी उरतो.
​मुख्य प्रश्न जे अनुत्तरीत आहेत:
​अवैध धंद्यातून जमा झालेल्या ‘कोट्याधीश’ संपत्तीची चौकशी होणार का?
​LCB पोस्टिंगच्या ‘सुपारी’ प्रकरणात सहभागी असलेल्या मध्यस्थांवर गुन्हे दाखल होणार का?
​राजकीय दबावाखाली पोलीस प्रशासन भ्रष्ट अधिकाऱ्यांना पाठीशी घालणार का?
​आता चेंडू जिल्हा पोलीस अधीक्षकांच्या कोर्टात आहे. उमरखेडच्या जनतेला आणि जिल्ह्याला या भ्रष्ट कारभारातून मुक्त करण्यासाठी केवळ ताकीद नव्हे, तर कठोर कारवाईची अपेक्षा आहे. अन्यथा, खाकी वर्दीतील हा काळा बाजार यवतमाळ जिल्ह्याच्या शांततेला आणि सुव्यवस्थेला ग्रहण लावल्याशिवाय राहणार नाही.(क्रमशः)

ब्युरो रिपोर्ट साहसिक News-/24 यवतमाळ-वर्धा
​