🔥बेंबळा नदीच्या छाताडावर वाळूमाफियांची कुऱ्हाड,नांदेसावंगी घाटावर भरदिवसा ६ फावड्यांनी लूट; तहसीलदार व ठाणेदारांची संशयास्पद ‘मिश्कील’ चुप्पी!
🔥हीच ती बेंबळा नदी,दुष्काळात होरपळणाऱ्या यवतमाळकरांच्या हक्काच्या पाण्यावर वाळू तस्करांचा दरोडा: बाभुळगावच्या बेंबळा पात्रात राहील शेखचा उच्छाद, महसूल-पोलीस प्रशासन विकले गेले की हतबल?
यवतमाळ -/ यवतमाळ जिल्ह्यावर दुष्काळाचे भीषण सावट पसरलेले असताना आणि पाण्यासाठी जनता थेंब-थेंब मोताद होत असताना, बाभुळगाव तालुक्यातील बेंबळा नदीच्या पात्रात मात्र वाळूमाफियांच्या क्रूर नफेखोरीचा नंगानाच सुरू आहे. नांदेसावंगी घाटावरून कुख्यात तस्कर शेख राहील शेख याचे तब्बल ६ फावडे भरदिवसा नदीपात्राचे लचके तोडत आहेत. नदीचे पाणी हाच नागरिकांचा जगण्याचा आधार उरलेला असताना, या जीवनवाहिनीचा गळा घोटला जात आहे. धक्कादायक बाब म्हणजे, या गंभीर गुन्ह्याबाबत तहसीलदार मिरा पागोरे आणि ठाणेदार दिपमाला भेंडे यांना जाब विचारला असता, त्या मिश्कील हसून टोलवाटोलवी करत वेळ मारून नेत आहेत. हा प्रकार केवळ कर्तव्यशून्यतेचा नसून वाळूमाफियांशी संगनमताचा थेट पुरावा तर नाही ना, असा संतप्त सवाल आता जनता विचारत आहे. यवतमाळ जिल्हा हा अधिकृतरीत्या तीव्र पाणीटंचाई आणि दुष्काळाच्या झळा सोसत आहे. शेतकऱ्यांच्या आत्महत्या आणि कोरड्या पडलेल्या विहिरी-बोअरवेल यामुळे ग्रामीण भागातील जनजीवन आधीच उद्ध्वस्त झाले आहे. अशा बिकट परिस्थितीत ज्या मोजक्या नद्यांमध्ये पाणी शिल्लक आहे, त्या नद्यांचे पाणी म्हणजे पंचक्रोशीतील हजारो नागरिकांचा आणि मुक्या जनावरांचा अंतिम जगण्याचा आधार बनले आहे. मात्र, बाभुळगाव तालुक्यातून वाहणाऱ्या बेंबळा नदीच्या नांदेसावंगी घाटावर वाळू तस्करांनी अक्षरशः दरोडा टाकला आहे.
स्थानिक नागरिकांकडून मिळालेल्या माहितीनुसार, बाभुळगाव येथील रेती तस्कर शेख राहील शेख याचे तब्बल ६ मोठे फावडे (रेती उपसा करणारी यंत्रणा) या पात्रात रात्रंदिवस, विशेषतः भरदिवसा धडधडत आहेत. नदीपात्राच्या दोन्ही बाजूंना खोल खड्डे पाडून वाळू उपसली जात आहे. एका पाठोपाठ एक ट्रक, टिप्पर आणि ट्रॅक्टर या अवैध वाळूची खुलेआम वाहतूक करत सुसाट धावत आहेत. भरदिवसा चालणाऱ्या या बेधडक वाहतुकीमुळे सामान्य नागरिकांमध्ये प्रचंड घबराट पसरली असून, पात्रातील वाळू उपसल्यामुळे पाण्याचा प्रवाह नष्ट होण्याचा आणि जलस्रोत पूर्णपणे आटण्याचा धोका निर्माण झाला आहे.
सर्वात संतापजनक बाब म्हणजे या गंभीर प्रकरणाकडे डोळेझाक करणाऱ्या जबाबदार प्रशासकीय अधिकाऱ्यांची बेपर्वा भूमिका! तालुक्याचे महसूल प्रमुख म्हणून जबाबदारी सांभाळणाऱ्या तहसीलदार मिरा पागोरे आणि कायदा-सुव्यवस्थेच्या रक्षक असलेल्या ठाणेदार दिपमाला भेंडे यांना जेव्हा प्रसारमाध्यम प्रतिनिधी व स्थानिक नागरिकांनी याबाबत जाब विचारला, तेव्हा त्यांनी कोणतीही ठोस कारवाई करण्याचे आश्वासन देण्याऐवजी अत्यंत मिश्कील उत्तरे देऊन वेळ काढून नेली. एका दुष्काळग्रस्त भागातील नागरिकांच्या अस्तित्वाचा प्रश्न उपस्थित असताना अशा बेजबाबदार व विनोदी थाटातील प्रतिक्रिया महसूल आणि पोलीस प्रशासनाच्या प्रामाणिकतेवर काजळी फासणाऱ्या ठरत आहेत. नदीपात्रातून शेकडो ब्रास वाळू दररोज गायब होत असताना आणि डंपरच्या रांगा रस्त्यावरून धूळ उडवत जात असताना महसूल विभागाचे मंडळ अधिकारी, तलाठी आणि पोलिसांची गस्त नेमकी कुठे झोपलेली असते? असा सवाल उपस्थित केला जात आहे. स्थानिक पातळीवर चर्चा रंगली आहे की, केवळ तोंडदेखल्या कारवायांचा देखावा उभा करायचा आणि पडद्यामागून महिन्याकाठी लाखोंचे ‘हप्ते’ गोळा करायचे, अशी अभद्र युती या वाळू तस्करांशी झाली आहे काय?
नदीपात्रातून बेसुमार वाळू उपसल्याने नैसर्गिक जलसंधारणाची साखळी तुटते. वाळू हा नदीचा नैसर्गिक गाळणी थर असतो, जो पाणी धरून ठेवतो. नांदेसावंगी घाटावर ६ फावड्यांनी नदीच्या दोन्ही बाजूंची चाळण केल्यामुळे भूजल पातळी झपाट्याने खालावत आहे. उन्हाळ्याची चाहूल लागताच परिसरातील विहिरी आटण्यास सुरुवात झाली आहे. जर हा अवैध उपसा तातडीने थांबला नाही, तर येत्या काही दिवसांत बाभुळगाव तालुका पाण्यासाठी वणवण भटकताना दिसेल.
शासकीय महसुलाची कोट्यवधी रुपयांची लूट होत असताना आणि पर्यावरणाची नासधूस होत असताना वरिष्ठ जिल्हाधिकारी आणि जिल्हा पोलीस अधीक्षकांनी या प्रकरणात त्वरित लक्ष घालण्याची गरज निर्माण झाली आहे. जर या कुख्यात तस्कर राहील शेख आणि त्याच्या टोळीवर कठोर गुन्हे दाखल करून, वाहने जप्त करण्यात आली नाहीत, तसेच तस्करांना पाठीशी घालणाऱ्या तहसीलदार व ठाणेदारांची चौकशी झाली नाही, तर संतप्त नागरिक आणि शेतकरी थेट रस्त्यावर उतरून तीव्र जनआंदोलन छेडतील, असा निर्वाणीचा इशारा ग्रामस्थांनी दिला आहे.(क्रमशः)
🔥बेंबळा नदीच्या छाताडावर वाळूमाफियांची कुऱ्हाड,नांदेसावंगी घाटावर भरदिवसा ६ फावड्यांनी लूट; तहसीलदार व ठाणेदारांची संशयास्पद ‘मिश्कील’ चुप्पी!
